بيتر بان

جريت من على السرير بسرعة فتحت الشباك لقيت الشمس وشوية سحاب....مفيش مشاكل....لبست البالطو فوق البيجامة ونزلت....وكالعادة وهى ماشية كانت بتدندن اغنية هى بس اللى تعرفها , وماشية بسرعة مش مستعجلة ....لا بس علشان تسبق الهواء....خطفت عقد ياسمين و لبستة ...بتعشق الورد...دخلت الكافية اللى هى بتحبة ولقيتة هناك...
- شفت اللى حصل؟
- يخربيتك خضتينى...اقعدى واهدى كدة فى اية ؟
- عاوزة كابيتشينو
- واحد كابيتشينو هنا يا ابنى...فية اية سيبتى ركبى؟
- الساعة 6 الصبح ضربت فى دماغى اطير رحت وقفت على سور البلكونة وفى ايدى الشمسية اللى هطير بيها.....بس لقيت الدنيا ساقعة والجو هيمطر ...قولت اخليها لما الشمس تبقى موجودة .....ونزلت
- دى حاجة من الاتنين يا اما حلم وخير اللة ما اجعلة خير او محاولة انتحار يا ماما
- لية مش عاوز تصدق ....بيتر بان قالها كدة فى الفيلم ...(فكرى افكار حلوة وانتى تطيرى)
- يا حبيبتى دة علشان المخرج عايز كدة
-بس انا مقتنعة ان فى جنيات
- مفيش جنيات وبطلى فرجة على افلام قبل ما تنامى....واطلعى من دماغى بقى ورايا شغل
- وقالها كمان(متقوليش ان مفيش جنيات كل مرة بتقولى كدة بيموت فيها جنية)
طلعت من الكافية...خطواتها هديت...غنوتها سكتت....راحت بعيد عند البحر..وكل اللى على لسانها...اقدر اطير..فى جنيات.
قام من على السرير فتح الشباك بص للسماء لقاها بتطير....صحى من النوم على الكابوس او الحلم يمكن...هو بيتمنى يشوفها ولو دقيقة تانى...بعد ما اختفت من يومها...وحشتة اوى...........فتح الشباك بجد المرة دى....فكر فيها...لقى عقد الياسمين جنبة...ولقى الارض على بٌعد 3 خطوات من رجلة ......