مانجة ولا فراولة
وبعد ربع ساعة من التحليل اكتشفت ان المانجة افيد لان الفراولة بتجيبلها حساسية
....واحد مانجة معاك يابنى
الكلية دى ولا دى
وبعد شهر تفكير و تحليل لقت ان الكلية دى اضمن فى مستقبلها وفى شغلها مش مهم دراستها ولا مهم الراحة النفسية اهم حاجة النتايج المضمونة
.....واحد الكلية دى معاك يا بنى
عريس بعربية وشقة ولا عريس بقلب و شقة
النتايج المضمونة تتطلب تضحيات
....واحد عريس بعربية وشقة يا بنى
وفى مرة وهى ماشية فى الطريق لقيت مركب فى البحر ملوش اصحاب ...ولاول مرة قررت تركب من غير ما تحسب اعراض جانبية..كنوع من انواع الترفيهة عن مخها
ركبت وجدفت بمنتهى الروقان..كفاية تحس انها مرتاحة وهى بصة على السماء والسماء حضناهاوالمرة دى مش مضطرة تدور على سبب تبص بية للسماء.....وصل المركب لوحدة على جزيرة فيها كهف
حوالين الكهف كان فى شجر كتير وورد مضفر من كل ناحية وبكل الالوان ومن كل نوع...صوت العصافير سيمفونية محدش لسة قدر يعزفها......ريحة الياسمسن والريحان مع الفواكهة عاملة كوكتيل ملوش حل...سماء صافية ..بحر من كل حتة ...وكهف؟؟
حطت كل اعتبارتها ومخاوفها وتحليلتها فى المركب ...وحرقت المركب
ودخلت فى سور الورد اللى رايح على الكهف...مش مهم النتايج جنب الاحساس دة...المهم انها حرقت المركب بايديها